வாங்க!!!! வாங்க!!!!

வாங்க!!!! வாங்க!!!!நீங்க வந்து படிக்கிறதுக்கு சந்தோசம்!!
நிறை குறை சொல்லிட்டு போனா ரொம்ப சந்தோசம்!

Thursday, February 26, 2015

பாகம் -23

இன்பம் துன்பம் இரண்டும் அடுத்தவர்
தினிப்பன்று அவரவர் நினைப்பே.
_____________________________________________________

பரிட்சைக்கு பின் பாடம் புகட்டும்
பண்பட்ட ஆசிரியர் அனுபவம்.
_____________________________________________________
சொர்க்கம் கிடைக்க வேண்டி வாழ்வை
நரகமாக்கல் மனித மடமை.
_____________________________________________________
புரிந்த பிரியங்கள் பிரிந்திடின் புரிதலை
புரிய வைக்கும் பிரிவு.
_____________________________________________________
சலனமில்லா உடல் சவம் எனில்
மனமோ சிவ மாகும்.
_____________________________________________________
என்ன நடக்குமோ என்ற பயத்தினால்
எள்ளளவும் பலன் இல்லை.
_____________________________________________________
தன்னை தகர்க்கும் செயற்கைக்கும் கருப்பொருள்
தந்து உதவும் இயற்க்கை.
_____________________________________________________
கனவை கருக வைத்து குடும்பத்தை
கலங்க வைக்கும் கருச்சிதைவு.
_____________________________________________________
பசியில்லா உணவும் தோல்வியில்லா வெற்றியும்
என்றும் ருசிப்பது இல்லை.
_____________________________________________________
சில்லரை மனிதர்கள் வாங்க முடியாத
மொத்த வியாபாரம் நேர்மை.
_____________________________________________________

Saturday, November 29, 2014

பாகம் -22

எந்நிலை மாறினும் தன்னிலை மாறா
மனிதரை காண்பது அரிது.
_____________________________________________________

நகைச்சுவை நோய் தீர்க்க நகையின்
சுவை நிதி தீர்க்கும்.
_____________________________________________________

பணத்துடன் பாவத்தை சேர்த்து வைத்தால்
பாவமே பணத்தை பறித்திடும்.
_____________________________________________________

சாபமும் சாதகமாய் மாறும் சாதுர்யமாய்
சாதிக்கும் சாமர்த்தியசாலி இடத்து.
_____________________________________________________

உடலை உருவாக்கும் உடலுக்கு உருவாக்கத்
தெரியும் நோயின் மருந்து.
_____________________________________________________

விடியா இரவென்றும் விலகா பிணியென்றும்
வாழ்வில் என்றும் இல்லை.
_____________________________________________________

இருந்தார் இறந்தா ராயினும் இருந்த
இருப்பால் இறந்தும் இருப்பர்.
_____________________________________________________

முடியாதென முடிவெடுத்த பின் முயலும்
முயற்சி முடிவை தரா.
_____________________________________________________

எழில்கண்டு செய்யும் தொழில்கண்டு பிறரை
மதித்தலும் மிதித்தலும் மடமை.
_____________________________________________________

பயமில்லா பகட்டில்லா பக்தி பெற்றிடும்
பரவசநிலை யெனும் முக்தி.
_____________________________________________________

பாகம் -21

சுணக்கம் இல்லா சுய சிந்தனையை
சுடர்விட செய்யும் சுதந்திரம்.
_____________________________________________________

தளராது துவளாது துணிந்திடும் துணிவிடம்
பாயாது பயந்திடும் பயம்.
_____________________________________________________

துணிவாய் பணிவாய் கனிவாய் இனிவாய்
உயர்வாய் திறவாய் திருவாய்.
_____________________________________________________

உழையாதும் உயர்த்தும் உயிர் பிரிவதால்
உயிர் பெறும் உயில்.
_____________________________________________________

பிணி மறந்து பணி செய்யும்
பாச பட்டறை கருவறை.
_____________________________________________________

மதி மறைத்து பிதற்ற வைக்கும்
மனிதனின் கிறுக்கும் செருக்கும்.
_____________________________________________________

வலி மறந்து வாழ்வில் ஒளி
தேடும் திருநாள் தீபாவளி.
_____________________________________________________

மனவீட்டில் பணம் குடியேற மறுகணமே
மனங்குன்றி குடிபெயரும் குணம்.
_____________________________________________________

தகரமாய் இருப்பினும் குறைவில்லை துருவற்று
தரமாய் இருக்கும் வரை.
_____________________________________________________

பெரும்படை முன் வீழா மன்னனும்
மெல்லிடை முன் வீழ்வதுண்டு.
_____________________________________________________

Thursday, August 25, 2011

பாகம் -20

ஒன்றுபட்டு குரல் கொடுக்க - ஒடுக்கும்
அரசும் செவி மடுக்கும்.
_____________________________________________________

பிரார்த்தனை ஆராதனை பலன்தரா பகட்டிடம்
பக்தி பணியும் போது.
_____________________________________________________

சுணக்கம் இல்லா சுய சிந்தனையை
சுடர்விட செய்யும் சுதந்திரம்.
_____________________________________________________

வீம்பு வம்பை வளர்க்கும் வளரும்
வம்பு அன்பை தளர்க்கும்.
_____________________________________________________

பேதம் ஒழித்து சமத்துவம் பிறக்க
ஓதும் வேதம் காதல்.
_____________________________________________________

விரக்கடை அளந்து வண்டலில் விதைத்தாலும்
விளையாது சத்தில்லா விதை.
_____________________________________________________

இருமனம் இணங்கி பிணங்கி சுணங்கும்
இடியாப்ப சிக்கல் காதல்.
_____________________________________________________

இறங்கும் ஞாயிறும் உறங்கும் உள்ளமும்
என்றும் இருளை ஏற்றும்.
_____________________________________________________

மாயமோ மோகமோ மானிட சாபமோ
சகித்து சுகிக்கும் காதல்.
_____________________________________________________

இருப்பு இருப்பதால் இறுமாப்பு சுரக்கின்
இருப்பே நெருப்பாகி சுடும்.

Thursday, June 23, 2011

பாகம் -19

பரிவற்று பரிகசித்து பார்க்கும் துணையின்
பிரிவில் புரியும் பிரியம்.
_____________________________________________________

தெரியாது தெளியாது வாழ்வில் உதவாது
புரியாது விதைத்த கல்வி.
_____________________________________________________

திட்டை தடுக்கும் தடையெனாது தவறை
துடைக்கும் துணையென கொள்.
_____________________________________________________

சினம் கூட்டி குணம் சிதைக்கும்
கூடா நட்பின் பணம்.
_____________________________________________________
நிறம் இனம் பாராது குணம்
திறம் போற்றும் இறை.
_____________________________________________________

பற்று பற்றாகி பற்றற்று பற்றிடின்
முற்றற்று முற்றிடும் பகை.

_____________________________________________________

எல்லாம் எளிதாய் நடந்தால் இகழ்வாய்
தெரியும் உழைப்பும் உயர்வும்.
_____________________________________________________

உலகு உறங்குவது போல கிறங்கினும்
ஒருபாதி விழித்து கறங்கும்.
__________________________________________________________

காட்டுமிராண்டிகள் கூட கருணை கொள்வர்
நாட்டுமிராண்டிகளால் குமுறும் குடிகண்டு.
__________________________________________________________

இது இப்படிதான் அது அப்படிதான்
என்பார் எதுவும் புரியாதார்.

Saturday, May 7, 2011

பாகம் -18

முனைப்புடன் விதைக்கும் உழைப்பு வளர்க்கும்
செழிப்புடன் நன் மதிப்பு.
__________________________________________________________

எனதே என்றிராது நமதே என்றிருப்பின்
எளிதே பிறக்கும் நன்மை.
__________________________________________________________

நாவில் நற்சொல்லும் நெஞ்சில் நஞ்சும்
இனித்திடும் விஷம் போலாம்.
__________________________________________________________

மனித நேயம் மறந்து மதநேயமாகி
மண்ணில் மறையும் மனிதம்.
__________________________________________________________

அறுபதுகள் இருபதை புரிதல் எளிது
இருபதுகள் அறுபதை அறிவதினும்.
__________________________________________________________

எச்சரிக்கை அறியாது வாழ்வானும் உண்டு
எச்சரிக்கையாய் வீழ்வானும் உண்டு.
__________________________________________________________

மாற்றிட முடியுமா இயற்கையின் சீற்றத்தை
இறுமாப்பு மனிதனின் இயல்கள்.
__________________________________________________________

மனதில் மரித்து உதட்டில் சிரித்தாலும்
உள்ள(த்)தை உரைத்திடும் கண்.
__________________________________________________________

பட்டம் பெற்றோர் பட்டம் விட்டாலும்
நூலில்லா பட்டம் பாழ்.
__________________________________________________________

போட்டியில் போட்டியிடாது வாழ்வில் போட்டியிட
வாழ்க்கை நொடிந்து வாடிடும்.
__________________________________________________________

Thursday, December 30, 2010

பாகம் -17

இல்லாதோர் பலமைல் புசிக்க நடக்க
இருப்போர் நடப்பர் செரிக்க.
__________________________________________________________

மறதி மன்னிப்பை மனிதன் மறக்க
மறைந்திடும் மன அமைதி.
__________________________________________________________

தாழ்ந்தவர் உயர்ந்தவர் தகுதி தரத்தினால்
அன்றி வளத்தினால் அல்ல.
__________________________________________________________
மாயமோ மந்திரமோ மாற்றுமோ மக்களை
முட்டாளாக்கி முடக்கும் மந்திரிகளை.
__________________________________________________________

தெரியாதார் தெரியலாம் தெரிந்தும் தெளியாதார்
தெரிந்ததால் திரிந்து துயருறுவர்.
__________________________________________________________

மாற்றாகும் மாற்றங்கள(பெரும்பாலும்) மன மகிழ்வுதரும்
உடல் மழுங்க வைக்கும்.
__________________________________________________________

உயிருடன் வாழ்தலினும் உயிர்ப்புடன் வாழ்தலே
வாழ்வில் உயர்வு தரும்.
__________________________________________________________

இன்பமே என்னாளும் துன்பம் இல்லை
ஈடில்லா இறையருள் பெறின்.
__________________________________________________________

தவறி தவறலினும் தவறாகும் என
நம்பி தவறல் தவறு.
__________________________________________________________

மது உண்டு மதி கெட்டபின்
விதி நொந்தென்ன பயன்.

Friday, November 12, 2010

பாகம் -16

ஆணவம் தன்னுள் ஆனந்தத்தை மறைக்க
வெளியே தேடும் மானிடம்.
__________________________________________________________


பழுதாகி புண்பட்டாலும் புரை நீக்கி
பழுதகற்ற பண்படும் மனம்.
__________________________________________________________


நினைத்தது நினைத்தபடி நிலைக்காத போதும்
நிலைப்பது நிகரில்லா நல்லனுபவம்.
__________________________________________________________


திருந்த வைக்கும் அறிவுரை பரிசு
வருந்த வைப்பதோ தரிசு.
__________________________________________________________

நானென்று இருத்தல் என்றும் நலிவு
நாமென்று இருத்தலே வலிவு.
__________________________________________________________

அதிகாரம் ஆளுமை மட்டும் இருக்கும்
இடத்து இருப்பதில்லை அன்பு.
__________________________________________________________

வழிகாட்டல் வற்புறுத்தலிடை வித்யாசம் சிறிது
அதன் வினை பெரிது.
__________________________________________________________

தன்செயல் பிறர் போற்றல் பெருமை
தானே போற்றல் சிறுமை.
__________________________________________________________

சறுக்கல் இல்லா வாழ்வின் சாரம்
சலனம் இல்லா சந்தோஷம்.
__________________________________________________________

நன்மையும் தீதென திரிந்து தெரியும்
வெறுப்போர் செய்தார் எனின்.
__________________________________________________________

Saturday, October 2, 2010

பாகம் -15

உறவு உயர்ந்திடும் உள்ளம் இணைந்திடும்
உற்றோரை உளமார பாராட்ட.
__________________________________________________________

தரம் கூட்டும் உரம் தரமில்லையெனில்
உரமிட்டு என்ன பயன்.
__________________________________________________________

பணங்கண்டு குணம் மாறும் உறவு
விளக்கு இல்லா இரவு.
__________________________________________________________

பண்பிடம் பணிவும் பகையிடம் துணிவும்
பலம் தரும் குணமாம்.
__________________________________________________________

மென்மையாய் மொழிவதால் மெய்யென திரிந்து
உயர்ந்து விடாது பொய்.
__________________________________________________________

உன்னை உள்ளூர உணர உள்ளம்
உருகும் உன்னதம் ஊறும்.
__________________________________________________________

உண்டு உண்டிமட்டும் பெருக்கி உழலும்
மனிதரிடம் உண்டோ மதி.
__________________________________________________________

பக்தரின் பக்தி பழுதானால் பரிசுத்த
பகவானை பழுப்பென பழிப்பான்.
__________________________________________________________

பேசி தெரிதலினும் நேசித்து அறிதல்
பிரியா உறவின் வலிவு.
__________________________________________________________
வீட்டை விட்டு வெளியே வராதவரை
தெரிவதில்லை விடியலின் கரை.

Saturday, September 4, 2010

பாகம் -14

அறிவுக்கண் திறவும்போது இதயகண் பழுதானால்
அழிவே அறிவின் பயன்.
__________________________________________________________

வீழ்ந்தே வாழ்வினும் தாழ்ந்து வாழ்வதில்லை
எழுச்சியுடன் விழும் நீர்வீழ்ச்சி.
__________________________________________________________

ஆலம் விழுது விழுவது வீழ்வதற்கல்ல
பலமுடன் பலநாள் வாழ்வதற்கு.
__________________________________________________________

வீழ்ந்தாலும் வெகுண்டு எழுதலே வாழ்வின்
விடியலுக்கு வித்திடும் விதை.
__________________________________________________________

ஊசியால் தினம்தினம் உருகுலைவதினும் வாள்
வீசி வீழ்வது மேல்.
__________________________________________________________

எதிர்பார்ப்பில்லா அன்பென்பது இல்லை ஏனெனில்
எதிர்பார்ப்பின் அது அன்பில்லை.
__________________________________________________________

பொருட்செல்வம் தேடி அருட்செல்வம் தொலைத்து
உடமையின் அடிமையாதல் மடமை.
__________________________________________________________

எதிலும் எதிர்பார்த்து ஏங்கும் உறவு
என்றும் இணையா பிளவு.
__________________________________________________________

பெற்ற பிறந்த பெற பிணைந்த
உறவில் மட்டுமே உரிமை.
__________________________________________________________

மும்மையெண்ணி முடங்காது மறுமையெண்ணி மருளாது
இம்மையை ஏற்றலே நன்மை.

Saturday, June 5, 2010

பாகம் -13



கண்டிப்பு தண்டிப்புடன் பண்பை போதிக்கும்
பெண்ணிடம் பெற்றவளின் பாசம்.
__________________________________________________________

கண்டிப்பு இல்லாது கரிசனம் காட்டும்
ஆணிடம் அன்னையின் அன்பு.
__________________________________________________________

சண்டை சமாதானத்துடன் சகிப்பும் சேர்ந்து
சுரக்கும் சகோதர சிநேகம்.
__________________________________________________________

விரும்பி முகம் அரும்பி விருந்தோம்பின்
வயிறொடு நிறையும் மனம் .

__________________________________________________________

சிறு பிழைக்கண்டு பகை போற்றாது
பிழை பொறுத்தல் பண்பு.
__________________________________________________________

எதிரியை அறிதல் எளிது நல்
நண்பனை அறிதல் அரிது.
__________________________________________________________

இன்றை நிராகரித்து நேற்றால் நொந்தலும்
நாளைகண்டு நடுங்கலும் இழிவாம்.
__________________________________________________________

குழந்தையின் குறைகண்டு குரையாது நிறையை
தட்டிக்கொடின் குறை குறையும்.
__________________________________________________________

இல்லாதோர் இயலாமையை இருப்போர் இகழ்ந்து
எள்ளல் ஏளனச் சிரிப்பு.
__________________________________________________________

வாழ்வில் வெற்றி விடியலின் விடை
உழைப்பில்லா சோம்பலின் விடை.


Wednesday, May 19, 2010

காதல் கல்லறை

இளமை திமிரில்
இச்சை கொண்டு
இல்லம் மறந்து
இசைந்து செல்ல

இரயில் ஆனாலும்
என்னவன் விரும்ப
என்னை முழுதாய்
விருந்தாய் படைக்க

விழித்து பார்த்தால்
வீதியில் நான்
நாயகனும் இல்லை
நகையும் இல்லை

எச்சில் இலையாய்
விழுந்த என்னில்
மிச்சம் பார்த்து
எச்சிலை நாய்கள்

நித்தம் நித்தம்
என்னை சுகிக்க
உயிர் வேண்டி
நானும் சகிக்க

வாடிய பின்னும்
தான் இன்புற
என்னை இம்சித்து
ரசித்த சுற்றம்

உணவின்றி
உயிர் மறித்து
உடல் எரித்த
பின் தான் விட்டது
என்னை....

நாட்டில் எண்ணிக்கை
கூடியதால் தான்
காட்டில் விலங்குகளின்
எண்ணிக்கை குறைந்தனவோ...
(காதலால் கற்பிழந்து தன்னிலை இழந்து கல்லறை செல்லும் வரை மனித மிருகங்களால் களங்கபட்ட மஹாவிறுக்கு...

நேசித்த பாவத்தால்
வேசி ஆனவள்
)

பாதித்ததால் பதித்தேன்
இப்பதிவு
உங்களை பாதித்தால்
என்னை மன்னிக்கவும்...

Sunday, March 14, 2010

பாகம்-12



புரியாபோதும் பிறர் சிரிக்க நாம்
சிரித்தல் கட்டாயச் சிரிப்பு.
__________________________________________________________

சபை வேண்டி சண்டைகாரர் ஆயினும்
சுமக்கும் சிரிப்பு புன்சிரிப்பு.
__________________________________________________________

இல்லா இடத்தில் இருக்காது -இருக்கும்
இடத்தில் இல்லை இருக்காது.

__________________________________________________________

என்னாளுமே பொன்னாளாக விண்ணாள எண்ணாது
உனையாள உள்ளம் உறுதிசெய். __________________________________________________________

வலி இல்லா வாழ்வில் வழியும்
இல்லை ஒளியும் இல்லை.
__________________________________________________________

இன்பம் சுருங்கி இன்னல் பெருகும்
உள்ளம் இறுகும் எனில்.

__________________________________________________________

வெறுப்புடன் விட்டு கொடுத்தலினும் விருப்புடன்
புரிதல் கூட்டும் பயன்.
__________________________________________________________

தொடங்கும் வேலையில் அடிப்படை முதலடி
தயார்நிலை எனும் வெற்றிப்படி.
__________________________________________________________

இறங்குவார் என்று இறுமாப்பாய் இல்லாது
இறங்கலே இறுக்கம் இறக்கும்.
__________________________________________________________

விதித்தபடி வாழ்வென வாழாது நீ
வித்திட்டபடி வாழ்தல் வலிவு.
__________________________________________________________

Saturday, February 13, 2010

பாகம்-11


தவம் நிதம் செய்யினும் பதம்
இல்லா மனம் பாழ்.
__________________________________________________________

துவங்குவதை துவங்காது துவங்கிய துவக்கங்கள்
துவங்கிய பின்னும் துவங்குவதில்லை.
__________________________________________________________

இன்பம் சுருங்கி இன்னல் பெருகும்
உள்ளம் இறுகும் எனில்.
__________________________________________________________

காலம் மாற ஞாலம் மாற
நாமும் மாறலே நலம்.
__________________________________________________________

மஞ்சமே தஞ்சமென மருளாது நெஞ்சத்தை
மகிழ்வித்து மகிழ்பவன் நல்மனிதன்.
__________________________________________________________

மறப்போம் மக்களை மழுக்கி மகிழ்வில்
மருளும் மன்னர்களை மறுப்போம்.
__________________________________________________________

உணர்ச்சிபூர்வ முடிவினும் உரிய உத்திகள்
உடனான முடிவுகள் உரவு.
__________________________________________________________

உயர்வை காட்டும் வளமை என்றும்
எளிமை கூட்டும் வலிமை.
__________________________________________________________

சிகரம் மற்றும் வாழ்வில் ஏற்றம்
சிரமம் இறக்கம் எளிதாம்.
__________________________________________________________

அறியா இயல்கள் இயலா தெனும்
இயல்கள் அறியும் அறிவியல்.

Saturday, January 9, 2010

2012 உலகம் அழியுமா? கிறுக்கனின் பார்வை


2012 உலகம் அழியுமா
அழியாதா அது
எனக்கு தெரியாது
விளக்கங்கள் தந்தாலும்
எனக்கு புரியாது
கிறுக்கனுக்கு தெளியாது

வாதம் வைப்பவர்
இருவகை அதில்
ஒருவகை அழியும் என்பர்
மறுவகை அழியாதென்பர்

அழியும் என்பார்க்கே
அல்லல் அதிகம்
அறிவித்த தேதியில்
அழியவில்லை என்றால்
அவமதிப்பும் அவமானமும்
அன்பாய் சேரும்

அழியாது என்பார்க்கு
அத் தொல்லை இல்லை
அறிவித்த தேதியில்
அழிந்தாலும் கேள்விகள்
எழுப்ப யாரும்
இருக்க போவதில்லை

வாதம் தேவயா
அது நாளை
நடந்தாலென்ன
நானூறாண்டு கழித்து
நடந்தாலென்ன

நாலாயிரம் ஆண்டு
என்று சொன்னாலும்
நாம் அதுவரை
நாட்களை நகர்த்த
இயலுமா...

இன்றோ நாளயோ
என்ற நம்விதியே
நமக்கு தெரியாத
போது உலகின்
விதியை கட்டம்
கட்டி பார்த்தலால்
என்ன பயன்

பிறப்பும் இறப்பும்
இயற்க்கை நியதி
அதில் தனியே
போவதிலும்
சேர்ந்து போதல்
சுகம் தானே
அதிலென்ன சோகம்

பல விடயங்கள்
அறிவு கொண்டு
அறிவது சுகம்
சில விடயங்கள்
கிறுக்கன் போல்
அறியாதிருப்பது
பெரும் சுகம்

சீட்டு விளையாட்டில்
அடுத்து என்ன
சீட்டு என்று
தெரியாது விளையாடலே
சுவாரஸ்யம் தரும்
அது போல்தான்
வாழ்வும் கிறுக்கனின் பார்வையில்....

நோய்

உடற்பிணி வந்து
உன்னை அணைத்தால்
உடற்பொருள் ஆவி
வலியில் நிறைந்தால்

கிறுக்கல் கூட
இறுக்கமாய் மாறிடும்
உணர்ச்சிகள் அதிலே
உறுக்கம் நிறைந்திடும்

முகமதில் மின்னும்
மலர்ச்சி மறைந்திடும்
அதற்க்குச் சான்றாய்
முடிகள் முளைத்திடும்

உறக்கம் கூட
உறங்க மறுத்திடும்
உடலும் அதனால்
மெல்ல இளைத்திடும்

நோய்கள் இல்லா
வாழ்வை போல்
நிகரான செல்வம்
வாழ்வில் உண்டோ...

Monday, December 14, 2009

பாகம்-10

சொல்லும் செயலும் கனிவாய் பிறக்க
எல்லாத் துயரும் மரிக்கும்.
__________________________________________________________

அறுஞ்சுவை உணவினும் பெருஞ்சுவை ஆரோக்கியம்
அருளும் நல் நகைச்சுவை.
__________________________________________________________

களைப்பு கபடில்லா உழைப்பின் நிறைவு
கட்டுக் கடங்கா உயர்வு.
__________________________________________________________

ஏற்றத்தில் நண்பன் உனை அறிவான்
இறக்கத்தில் நண்பனை நீயறிவாய்.
__________________________________________________________

செல்லும் சாலை தவறாயின் சீக்கிரம்
சென்று என்ன பயன்.
__________________________________________________________

இல்லாமை இயலாமை இதயத்தில் வளர
சொல்லாமல் வளரும் பொறாமை.

__________________________________________________________

குன்றா குன்றாய் கூடும் குணம்
கொடுத்து காக்கும் கொடை.
__________________________________________________________

நாளும் நெஞ்சில் நஞ்சை நட்டாலும்
நன்மை நவிலும் நற்குணம்.
__________________________________________________________

செய்யும் செயலில் சிரத்தை சீராக
செயலின் சிரமம் சிறிதாகும்.

__________________________________________________________

சோதனையை வினையாய் வேதனையாய் நினையாது
சாதனையாய் புனையும் துணிவு.






Saturday, October 31, 2009

பாகம்-9


மருந்தாய் மிடுக்காய் மதிப்பாய் மிளிர்வாள்
மருமகளாகி மாமியாரானதை மறவாதவள்.
__________________________________________________________

விந்தை விளக்க சிந்தை செழிக்க
விழியாகி வழியாவான் தந்தை.
___________________________________________________________

அறிவை அருளாய் அன்பை அமுதாய்
அறமாய் அளிப்பவள் அன்னை.
___________________________________________________________

இல்லா இடுக்கண் இருப்பதாய் நினைந்தால்
இருக்கும் இன்பம் இல்லாதாகும்.
___________________________________________________________

அடிமை வாழ்வின் செழுமையினும் சுதந்திர
வாழ்வின் வறுமை உயர்ந்தது.
___________________________________________________________

இன்பம் பெருக்கி துன்பம் வகுக்கும்
தன்னலம் இல்லா நல்லுறவு.
___________________________________________________________

எளியோரை வலியோராக்கி இன்னல் நீக்கி
பேரின்பம் பகரும் பக்தி.
___________________________________________________________

எதனை இழந்தாலும் என்றும் உயிர்த்திடும்
எதிர்பார்ப்பு இல்லா அன்பு.
___________________________________________________________

குயவரால் களிமண்ணும் கலையாகும் நல்
குருவால் அறிவிலிகளும் அறிஞராவர்.
___________________________________________________________

முயற்சி முதலில் தோல்வி தொட்டாலும்
வெற்றிக்கு வித்திடும் விடாமுயற்சி.
___________________________________________________________

Friday, September 18, 2009

பாகம்-8



அறிவு செறிவாக அன்பு அரிதானால்
வாழ்வு கரிந்து சரிந்திடும்.
___________________________________________________________

அகவை அடியேற அடியிறங்கும் புறஅழகு
அகலாது அழகாகும் அகஅழகு.
___________________________________________________________

மெய் மெலியும் மறைந்திடாது மாறாய்
பொய் பெருத்தாலும் பொசிந்திடும்.
___________________________________________________________

வாழ்வில் வேலையால் நல்வேளையும் வரும்
வேளையால் நல்வேலையும் வரும்.
___________________________________________________________

சோர்ந்த சோம்பேறியுடன் சேர்ந்து செய்தால்
சிறிய செயலும் சிரமமாம்.
___________________________________________________________

உதவிய உதவி உதவாது உய்த்திடும்
உதவியதை ஓயாது உரைத்திட்டால்.
___________________________________________________________

இருப்போர் இல்லாராய் இருந்து வந்தால்
இல்லாதோர் இருப்பவர் ஆவர்.
___________________________________________________________

வாழ்க்கையில் செல்வம் மட்டும் தேடி
வாழ்வை தொலைத்து விடாதே.
___________________________________________________________

வார்த்தையின் வீரியம் வாழவும் வைக்கும்
வரம்புமீறினால் வீழவும் வைக்கும்.
___________________________________________________________

ஈரமில்லா நிலம் உழுதிடவும்- ஈரமில்லா
மனம் பழகிடவும் பயன்படா.
___________________________________________________________

Monday, August 17, 2009

பாகம்-7


இரை குறை கண்டு இறைமாறும்
இனம் இறை காணா.
___________________________________________________________

அறிவும் செறிவும் ஒளிரும் உள்ளம்
பணிந்து கனிந்து மிளிரும்.
___________________________________________________________

மலராய் மலர்வாய் கனியாய் கனிவாய்
அன்பே அணியாய் அணிவாய்.
___________________________________________________________

மகிழ்ந்து மகிழ்தலினும் மகிழ்வித்து மகிழும்
மனமே மனமாற மகிழ்வுறும்.
___________________________________________________________

துடுப்பு இல்லா படகு போன்றது
பிடிப்பு இல்லா படிப்பு.
___________________________________________________________

புறத்தோற்றம் பார்த்து பிரிவினை போற்றாது
அகத்தோற்றம் பகுத்து பழகு.
___________________________________________________________

செய்யும் செயல் சரியாவதும் தவறாவதும்
சுற்றத்தின் சிந்தை வெளிப்பாடே.
___________________________________________________________

நீ காணாததை உன் பிள்ளைக்காண
நீ கண்டதை காணாதாக்காதே.
___________________________________________________________

குறைகூறல் குறைய குணம் கூடும்
காணும் கவலை கலைந்தோடும்.
___________________________________________________________

செல்வந்தராக செல்வம் சேர்த்தல் ஒருவழி
செலவு சிறுத்தல் மறுவழி.
___________________________________________________________